ភ្នំពេញ: ថ្មីៗនេះតាមរបាយការណ៍របស់នាយកដ្ឋានស្ថិតិទេសចរណ៍ បានឱ្យដឹងថាក្នុងរយៈពេល៥ខែ នៃឆ្នាំ២០២១ (មករា-ឧសភា) មានភ្ញៀវទេសចរអន្តរជាតិសរុប ៩១,៥៩៦នាក់បានធ្វើដំណើរចូលមកកាន់ប្រទេសកម្ពុជា ភាគច្រើននៃអ្នកដំណើរអន្តរជាតិទាំងនេះគឺជាអ្នកជំនួញ អ្នកវិនិយោគជាដើម។

តាមរបាយការណ៍បានឱ្យដឹងថា ក្នុងរយៈពេល៥ខែ នៃឆ្នាំ២០២១ (ខែមករា-ខែឧសភា) ភ្ញៀវទេសចរអន្តរជាតិដែលបានធ្វើដំណើរចូលមកកាន់ប្រទេសកម្ពុជា មានចំនួនសរុប ៩១,៥៩៦នាក់ ធ្លាក់ចុះ ៩២.២% បើធៀបក្នុងរយៈពេលដូចគ្នានៅឆ្នាំ២០២០។

គួររំឭកថានៅឆ្នាំ២០២០ ភ្ញៀវទេសចរអន្តរជាតិដែលបានធ្វើដំណើរចូលមកកាន់ប្រទេសកម្ពុជា មានចំនួនសរុប១,៣៦,១៤៣នាក់ ធ្លាក់ចុះ៨០.២% បើធៀបនឹងឆ្នាំ២០១៩។

ក្នុងរយៈពេល៥ខែជាមួយគ្នានេះដែរ ភ្ញៀវទេសចរអន្តរជាតិដែលចូលមកប្រទេសកម្ពុជាច្រើនជាងគេទាំង១០ រួមមាន៖

១, ភ្ញៀវជនជាតិថៃមានចំនួន៤៦,៣៩៥នាក់
២, ភ្ញៀវជនជាតិចិនមានចំនួន២៧,៦៩៣នាក់
៣, ភ្ញៀវជនជាតិវៀតណាមមានចំនួន៥,៨៣៣នាក់
៤, ភ្ញៀវជនជាតិឥណ្ឌូនេសុីមានចំនួន៣,១៣៨នាក់
៥, ភ្ញៀវជនជាតិកូរ៉េខាងត្បូងមានចំនួន១,៥៧៦នាក់
៦, ភ្ញៀវមកពីកោះតៃវ៉ាន់មានចំនួន១,២៨៨នាក់
៧, ភ្ញៀវជនជាតិអាមេរិក (U.S.A) មានចំនួន១,២៦៧នាក់
៨, ភ្ញៀវជនជាតិម៉ាឡេសុីមានចំនួន៧៤៩នាក់
៩, ភ្ញៀវជនជាតិជប៉ុនមានចំនួន៦៨៧នាក់
១០, ភ្ញៀវជនជាតិបារាំងមានចំនួន៥៤៩នាក់។

លោក ថោង ខុន រដ្ឋមន្ត្រីក្រសួងទេសចរណ៍ ធ្លាប់បានបញ្ជាក់ថាក្នុងចំណោមអ្នកដំណើរអន្តរជាតិដែលធ្វើដំណើរចូលមកប្រទេសកម្ពុជានេះភាគច្រើនគឺជាអ្នកទេសចរ អ្នកជំនួញ អ្នកវិនិយោគជាដើម ដែលពួកគេចេញចូលមកត្រួតពិនិត្យក្រុមហ៊ុនរបស់ខ្លួននៅប្រទេសកម្ពុជា៕